Kaizen


Kaizen Philosophy at ESLSE

የኢትዮጵያ የባህር ትራንስፖርትና ሎጅስቲክስ አገልግሎት ድርጅት የሀገራችንን ገቢና ወጪ እቃዎች በማጓጓዝ ከአምስት አስርት ዓመታት በላይ ተኪ የሌለው ሚናን በመወጣት ለሀገራችን እድገት የበኩሉን ሚና እየተወጣ የሚገኝ መንግስታዊ ተቋም ሲሆን እድሜ ጠገብ እና ግዙፍ ተቋምም ነው፡፡ ድርጅቱ አገልግሎት አሰጣጡን ከዘመኑ ጋር ለማራመድና የደንበኞቹን ፍላጎት ለማርካት በየጊዜው የተለያዩ የአሰራር ማሻሻያዎችን በማድረግ ዘመናዊና ቀልጣፋ አገልግሎት እየሰጠ ይገኛል፡፡

ኢባትሎአድ የጥራትና የምርታማነት ማሻሻያ የአመራር ፍልስፍና የሆነውን እና በጃፓናውያን ተቀምሮ ለሌሎች ሀገራት የተረፈውን የካይዘን ፍልስፍና ከጥር 2010 ዓ.ም ጀምሮ በቃሊቲ የየብስ ትራንስፖርት ቅ/ጽ/ቤት ተግባራዊ በማድረግ ተጨባጭ ለውጦችን ማስመዝገብ ችሏል፡፡ የስራ ቦታ ምቹ አለመሆን፣የጋራዥ ክምችት መጨመር፣ የንብረት አያያዝ ብክነት እና መሰል ለአሰራር ምቹ ያልሆኑ ጉዳዮች ካይዘንን ተግባራዊ ለማድረግ ምክንያች ነበሩ፡፡

የካይዘን ፍልስፍና በቃሊቲ የየብስ ትራንስፖርት ቅ/ጽ/ቤት ተግባራዊ መደረጉ አገልግሎት የማይሰጡ የነበሩ የተለያዩ ማሽነሪዎች ተጠግነው ስራ የጀመሩ ሲሆን በዚህም ለመለዋወጫና ለጥገና ይወጡ የነበሩ ወጪዎችን በማስቀረት ከ23 ሚሊዮን በላይ ብር ማዳን ተችሏል፡፡ በተጨማሪም ከ20 ዓመታት በላይ ተከማችተው የነበሩ የተለያዩ ጎማዎች፣ ፊልትሮ፣ መለዋወጫ እና ባትሪ ሽያጭ ከ11 ሚሊዮን በላይ ብር ገቢ ማግኘት የተቻለ ሲሆን በሌላ በኩል ለሰራተኞች ምቹ የስራ ሁኔታን ከመፍጠሩ ባለፈ ድርጅቱ በአጠቃላይ ከ 41 ሚሊዮን በላይ ብር ከወጪ እንዲድን ማስቻሉ ካስገኛቸው ውጤቶች  ጥቂቶቹ ናቸው፡፡

በአጠቃላይ ካይዘን ምቹ የስራ አካባቢን ከመፍጠሩ ባለፈ የተቋሙን አሰራር ቀልጣፋ እና ወጪ ቆጣቢ እንዲሆን ያስቻለው ሲሆን በቀጣይም ካይዘንን በሌሎች ቅ/ጽ/ቤቶች ተግባራዊ የማድረጉ ሂደት የሚቀጥል ይሆናል፡፡